～今日的行程～
5月16日：喜力啤酒博物館 Heineken Experience -> 午：Albert Cuyp Market -> 下午茶：The Seafood Bar -> Rijksmuseum 阿姆斯特丹國家博物館 -> A'DAM Lookout -> 晚：Simit Sarayi
我地旅行前預先係Klook度買左門票，
原價係HK$158，扣左積分同優惠券，價錢係HK$128.35一個人，
我地book左10:30am入場。
係導賞團咁樣，
有一個固定路線咁樣行，
每一個區域都會有唔同嘅職員講解。
喜力啤酒係1864年成立，
係歐洲最大嘅釀酒商。
喜力啤酒過往嘅招紙，
都好懷舊、好靚。
呢個係而家用緊嘅logo之一。
呢度都展覽左過往喜力啤酒用過嘅啤酒樽。
終於黎到啤酒廠啦，
呢度係喜力啤酒最早嘅啤酒廠。
除左酒之外，
呢度竟然有馬。
可惜啲馬都唔係望緊鏡頭。
呢幅牆用左好多唔同嘅語言文字寫住乾杯！
大家認識幾多種語言呢？
而荷蘭文嘅乾杯就係Proost！
終於有啤酒飲啦，Proost!
唔知係咪呢度啲啤酒新鮮啲，
好似特別好飲。
跟住呢part開始個導賞團嘅互動元素多啲啦。
如果你有健康問題就可以skip呢part，
因為會有特別嘅燈光同聲音效果。
係一種沉浸式嘅效果，
經歷啤酒入樽嘅過程。
呢啲機可以製作獨一無二嘅啤酒樽，
但係要比錢嘅。
呢度可以玩模擬斟啤酒，
教你點樣斟唔會有過多嘅泡泡。
呢part 叫做Live Your Music，
就緊係同音樂有關啦。
入面好似入左club咁，
但可惜停留左一陣就要走啦。
之後呢part就有啲單車比人坐上去。
原來佢係會key荷蘭嘅風景係綠幕，
扮係荷蘭度踩單車，
但係要有另一個朋友一齊黎先幫到我地拍片。
呢度仲有其他機係影相嘅，
仲有條link可以比你download返張相。
呢個係啤酒廠做背景呀。
終於黎到酒吧呢part啦，
可以係度換兩杯啤酒飲！
啲職員好熟手，
瘋狂幫客人斟啤酒。
一個朝早空肚飲左3杯啤酒！
仲有個Draught Challenge，
對自己斟酒有信心就出去參賽啦，
斟完仲可以自己飲返，
呃多杯酒飲！
最後就係喜力商店啦，
呢度有好多特別design嘅啤酒買。
之後就黎到Albert Cuyp Market，
呢個市場1905年就開始有架啦，
有新鮮食材、衫、嘢食、手信賣。
佢星期日休息，
其他時間開9:30am至5:00pm。
呢度有260個攤檔，
係歐洲最大嘅市場。
呢個市場都有大麻糖、大麻朱古力賣，
仲有我琴晚食嘅Space cake都有。
我最後買左張貼紙，€2，
用黎貼係喼上面，
mark低我黎過荷蘭阿姆斯特丹。
行極都仲有，
呢度係賣衫&鞋嘅，
好似幾平喎。
安迪比呢檔小食吸引左。
佢有好多唔同嘅炸野食賣。
呢個係炸魚塊 Kibbeling，€3.75，
間店話用左100%大西洋鱈。
炸魚塊係荷蘭好受歡迎嘅小食，
係19世紀，都係用鱈魚賣完剩左嘅肉炸成，通常係面頰肉。
我地好想食琴日都食過嘅Herring醃製過嘅生鯡魚，
見到呢間Volendammer Vishandel有，就試下啦。
一件€2.8，比琴日個間平。
原本想試下傳統嘅荷蘭食法，
但可惜佢幫我地切開左！
呢間嘅洋蔥同埋酸瓜比琴日個間多3倍咁多！
由於真係想挑戰一下傳統食法，
我地就再試多間鯡魚。
我地特別叫佢唔好切開，
成條上！
Herring嘅荷蘭食法係原條咁食，
拎住條魚尾，然後臉朝天，
跟住就掉條魚落口！
跟住就到我試下啦！
發現咁樣食，啲洋蔥會跌到周圍都係！
我都係普通咁樣食好啦。
原本我地book左1:45pm去梵高博物館 Van Gogh Museum，
但係由於AFC Ajax阿積士足球會贏左荷蘭甲組足球聯賽，
球迷會係Museumplein博物館廣場度慶祝，
由於安全問題，所以梵高博物館就會係1點關門啦。
睇返當日嘅新聞，
有超過十萬嘅球迷係Museumplein度慶祝，
簡直係阿姆斯特丹嘅盛事，
係街上都見到好多本地球迷都好開心咁行去Museumplein！
冇得行梵高博物館就唯有繼續食野，
我地就黎到The Seafood Bar食海鮮啦。
地址：Ferdinand Bolstraat 32, Amsterdam
首先黎左餐包同牛油，
另外餐廳白色同木嘅襯色都好舒服。
安迪叫左杯Albariño "Nai", Terra de Asorei，€6.50，
係西班牙嘅白酒，
Menu推薦我地叫嘅海鮮拼盤配呢杯酒。
我叫左荷蘭嘅La Trappe，€4.50，
見到menu有修道院啤酒，
就即刻叫黎飲。
早於中世紀開始 (約5世紀至15世紀)，
天主教修會Cistercians會釀造啤酒黎自給自足同埋貢獻社區，
時至而家，已經成立左The International Trappist Association, ITA聯盟，
呢個聯盟嘅修道院成員所生產的啤酒同符合準則先可以叫做Trappist beer。
之前係巴黎飲嘅Leffe啤酒，
就只係獲驗證的修道院風格啤酒，只可以叫做Abby Beer。
我地叫左底個盤Fruit de Mer海鮮拼盤，€22.50，
有mussels青口、cockles泥蚶、razor clams蟶子、periwinkles玉黍螺、amandes法國珊瑚蜆、North Sea crab麵包蟹、shrimps蝦、crab salad蟹沙律、seaweed salad中華沙律、2 oysters 2隻生蠔。
由於呢個海鮮拼盤得兩隻生蠔實在太少，
我地就加埋上層個盤6隻生蠔，
品種係Fine de Claire Tabl'Eau de Zélande No.3，€16.50，
係荷蘭Oosterschelde度養殖嘅。
好多海鮮呀，好滿足！
我地成餐總共食左岩岩好€50。
食完餐廳仲送左粒薄荷糖，
係有百幾年歷史嘅荷蘭牌子Wilhelmina。
係荷蘭周圍都見到運河，
為呢個鬧市帶黎恬靜嘅感覺。
去唔到梵高博物館，
我地就改黎Rijksmuseum 阿姆斯特丹國家博物館參觀啦。
見到街上面開始有工作人員為慶祝封路啦。
我地改黎Rijksmuseum，除左因為佢冇關門之外，
佢仲有梵高其中一幅自畫像，
去唔到梵高博物館，起碼都見到佢嘅畫啦。
街上越黎越多球迷行緊去Museumplein。
呢座main building係1885年就已經建成同開放，
呢座building係2012年翻新過，
令呢個充滿歷史感嘅建築帶啲現代感。
Rijksmuseum有成一百萬件館藏，
當中只有8000件嘅藝術品會展覽出黎。
等我show下部分我影左嘅藝術品啦。
我覺得呢個藝術品好迫真，
係一個好多層layer嘅畫，
畫緊一個火燒緊嘅城市。
呢3件擺設整得好細緻，
而且色彩繽紛。
呢度嘅彩繪玻璃都好靚好精細。
好鐘意歐洲歷史建築嘅室內裝修，
佢地嘅牆身同天花板都會設計得好靚好精細。
呢幅係Rijksmuseum嘅鎮館之寶之一，
荷蘭歷史上最偉大的畫家Rembrandt林布蘭係1642年畫嘅The Night Watch，
亦都係佢最出名嘅作品，
呢幅畫當年由一班志願民兵夾錢請Rembrandt畫，
但係Rembrandt冇依照當時軍人需依身份及軍階排列嘅不成文規定去畫呢班志願民兵，
因此呢班民兵好不滿，要求佢重畫，
但係Rembrandt唔肯答應，因此告上法庭，
Rembrandt因為咁而受到好多嘅攻擊。
呢幅畫唔知叫咩呢，
但都好有氣派。
終於見到梵高Vincent van Gogh嘅自畫像啦，
梵高畫左超過35幅自畫像，
而其中一幅係1887年畫嘅就係呢度展覽啦。
梵高係荷蘭後印象派畫家，
佢晚年受精神病同窮困擾，
係37歲用槍自殺而傷口感染身亡。
之後我地就去A'DAM Lookout，
首先搭地鐵黎Buiksloterweg站。
見到呢棟野就係A'DAM Lookout啦。
呢棟野有咩特別呢？
就係最高個層有韆鞦玩，
好似飛出街嘅感覺。
玩呢個 ‘Over the Edge’ swing韆鞦，首先要比€13.50 嘅入場費，
仲要再額外加€5 玩韆鞦，
所以我地係冇上去玩架。
我黎A'DAM Lookout其實係為左呢個I amsterdam地標。
呢個I amsterdam地標本身係放喺我地今日去嘅Rijksmuseum門口，
但由於太多遊客去影相，
所以就搬左黎A'DAM Lookout呢度。
聽聞而家已經搬左去Schiphol機場同埋Sloterplas Lake in the West，
大家想同呢個地標影相就要check下佢現時位置啦。
原本想趁冇人影一個wide shot，
但係始終都有人棟左係度。
我係呢個角度影多張先，
當時開始日落，
個太陽好猛烈，
所以我唔開眼啦。
晚上我地唔係好肚餓，又比呢間土耳其連鎖麵包店 Simit Sarayi吸引，
就決定今晚食麵包慳下錢啦。
地址：Damrak 57 1012 LL Amsterdam, Netherlands
呢個係Zeytinli Kaşarlı Dopdolu Simit，€4，
個包皮係土耳其bagel，
入面個餡係橄欖芝士。
呢個長條包係Sosisli Puf，€4.75，
係香腸包黎架。
之後又去左行Albert Heijn超級市場，
買左呢支Cold Pressed Juice送麵包，€1.75，
係橙加士多啤梨味。
仲買左呢個荷蘭牌子Tony's Chocolonely嘅Tiny Tony's Chocolate，€5.99，
買左兩盒做手信。
呢盒LiGA Haverkick Bosvruchten，€1.89，
係莓味嘅燕麥棒，
我覺得麻麻地。
仲買左呢盒Nakd Cocoa Coconut Bar，€3.09，
係朱古力椰子味嘅能量棒，
口感好硬，食左一條就唔係好想再食。
仲加左個膠袋，要€0.20。
Day3食左大麻煙，
Day4食左Space Cake同大麻糖。
今日我地就試迷幻松露 Magic Truffle，
Day2提及過吸食大麻其實係荷蘭仲係非法嘅，但係就唔會受到刑事懲罰，
而迷幻松露就反而係合法架。
迷幻松露其實係一粒粒軟身合桃咁嘅口感，
好似零食咁樣食落肚。
我地係Smart shop度買迷幻松露，
店員推介比岩新手食嘅Mexicana同埋Freshbox呢兩款松露，
佢仲比左本小冊子我地，
入面寫左食迷幻松露嘅注意事項。
1. 迷幻松露會帶來視覺同幻覺嘅效果，俗稱做一個trip旅程。你會變得好留意自己同埋想探索自己嘅性格。
2. 係安全、寧靜嘅環境下食迷幻松露。
3. 係精神狀態良好嘅情況先好食迷幻松露，唔好喺心情低落嘅情況下食。
4. 你想食迷幻松露嘅時候先好食，唔好其他人叫你去食先食。
5. 18歲以下嘅人唔可以食迷幻松露。唔好夾埋酒、其他藥物一齊食。食完唔好揸車。你嘅反應時間會比平時慢至少三倍。
6. 咀嚼耐啲同埋完全咀嚼哂迷幻松露會增加幻覺效果。唔好食到好飽先至食迷幻松露，食完野兩個鐘後先好食。
7. 唔好食超過一盒迷幻松露，而且開始嘅時候最多食半盒試試佢先，食完30-45分鐘之後就會開始有效果，到時再決定需唔需要再食多啲。
8. 要接受旅程初頭有短時間嘅恐懼同疑惑，呢個係旅程嘅必經階段，但放心會好快消失。最多6個鐘之後，個旅程就會完結。Smart shop會有trip stopper賣，另外，食適量嘅維他命C或者大量嘅糖，都會令旅程完結架。
9. 花啲時間去處理自己嘅感覺。
10. 迷幻松露係其中一樣大自然提供嘅良好體驗，所以好好去享受啦。
我覺得食完大麻會覺得動作變慢、感覺變慢，而且會口乾眼乾。
而迷幻松露主要係帶來視覺嘅效果，
酒店房好似變哂形狀咁，
有種發緊夢嘅感覺，唔怪之得會稱之為一個旅程！
我本身食完迷幻松露諗住沖涼，
但由於視覺效果太強，
四周圍嘅野望落去都變哂形，
我最後要食啲糖，等個旅程快啲完結，先可以沖涼。
不過安迪食完嘅視覺效果冇我咁強烈。
旅遊日期：2019年5月11日- 2019年5月20日
=========================
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
《西歐四國遊》
0 comments