當初計劃住宿個陣都想住D比較好的地方，而且要近捷運站(包括：西門、台北車站、忠孝新生、忠孝復興、忠孝敦化...etc)，所以民宿就完全無考慮過。而旅館都有考慮過，但之後無意係Expedia度發現到豪景大酒店，外表幾靚，而且只不過比旅館貴少少，加上近西門町，我地就立即book左間酒店啦。

當初係Expedia就係比呢張相吸引左，from http://www.expedia.com.hk/Taipei-Hotels-Hotel-Riverview-Taipei.h3884638.Hotel-Information

張圖係Google Map的街景圖，係台灣個陣唔記得影酒店門口。

1.價錢

係台灣呢4日3夜都住係豪景大酒店。價錢方面，我地係買package(機票＋酒店)，我地揀左中華航空同3晚豪景大酒店(雙人房，免費wifi，自助早餐)，兩個人加埋係HK$4960.08。

2.路程

酒店距離捷運站大概10分鐘的路程。我覺得唔係好遠，都acceptable。

西門站出口6，然後沿紅色線就去到酒店。

3.酒店房內

→酒店服務幾好。當日拖住行李行近酒店門口，已經有bellboy行出黎同我地打招呼同幫我地拎行李，check-in之後仲免費升級左做豪華客房，然後bellboy就幫我地拎行李上房。

→我地間房係10樓，出發前上網search過話間酒店有D房最近裝修過，無裝修的房D人話好殘舊，好彩我地住個間房唔殘舊都幾新，似係有裝修過。另外，間房似係由兩間房打通做一間，因為間房有兩度門，分別有兩個門號，但只可用其中一度門出入，而且間房有兩個廁所同兩個衣櫃，所以間房都算係幾大間。但係唯一可惜係我地間房唔係望淡水河景，而係街景，所以平時都拉窗簾算。

窗外景色。

剩係影左張床，唔記得影埋其他地方。我影相個個位有張梳化同茶几，身後有張書台。

→房內設施都齊全，牙膏、牙刷、梳、剃鬍刀、浴帽、番梘、拖鞋都有，全部都made in Taiwan，而且用完呀姐執房會refill。毛巾充足，有風筒、洗頭水同沐浴露都有，但無護髮素

拎得唔好嘥，拎左D未用的酒店用品番屋企。

→房內仲有兩支清水、烏龍茶包同UCC咖啡包，飲完沖完都會每日refill。另外房內無收錢的零食同野飲，雪櫃係空的。

→酒店的廁所係日本個D免治馬桶或者叫溫水洗淨便坐，即係馬桶格隔有個control panel，去完廁所可以禁相應的制去清洗pat pat或者陰部，馬桶就會噴出暖的水柱去清洗你的秘密部位架啦，都幾得意。而且個廁板長期都係暖的，冬天坐上去真係好舒服！

相又唔記得影啦，個馬桶類似係咁。

5.酒店早餐

酒店早餐真係麻麻地，食物種類唔多而且又唔好食，所以只係食左一次，寧願訓多陣好過啦。唯一值得去食的係餐廳的景觀幾靚，可以望到淡水河景以及多條繁忙的高速公路縱橫交錯。

只係一部份的景，餐廳望到的景好大。

斟果汁個陣先知原來柳丁汁係橙汁，台灣叫橙做柳丁，真係開心大發現，男朋友仲笑我孤陋寡聞。

6.總結

總括黎講豪景大酒店我係幾滿意（價錢、位置、服務、設施），去台北嘆的你不妨住呢間酒店。