10月20日：早：Pidapipo Gelateria (雪糕) -> Hosier Lane -> 午：MoVida (西班牙菜) -> State Library Victoria -> Royal Arcade -> Block Arcade -> 下午茶：Metro Burgers (澳洲菜) -> Docklands -> Federation Square -> 晚：Cố Đô (越南菜) -> 墨爾本機場
今日係《去墨爾本玩》的最後一日，
我地今日會周圍行下墨爾本市中心CBD。
最後一日我地都訓晏d先起身，
11:45am先食我地嘅第一餐，
黎左呢間Pidapipo Gelateria。
地址：401 Little Bourke Street, Melbourne, VIC, 3000, Australia
我地嘅早餐竟然係食雪糕，
Pidapipo Gelateria係好出名食Gelato架，
我揀左開心果味&紅桑子味。
呢條簡直係一條食街，好多餐廳呀，
下晝我地會再黎食下野。
之後我地行左黎Hosier Lane，
呢條街可以見到無數嘅街頭藝術作品。
好多遊客都會黎呢度影靚靚嘅塗鴉，
話說當時係呢度見到安心偷食事件未被揭發時候嘅黃心穎！
佢係度同女性朋友影緊相，
安迪覺得我認錯人，
我之後開黃心穎嘅Instagram，佢果然身處係墨爾本呢！
事後見佢都有post到呢個塗鴉嘅相。
呢間店外嘅塗鴉都畫到好逼真。
呢隻狗仔都畫到好可憐咁。
發現Deadpool嘅塗鴉。
我最鐘意呢句Dream Bigger的塗鴉。
見到呢個Quote都好搞笑：
"Be aware" kids...
Do ya research to avoid "trouble"
姐係叫人搵避孕方法去避免小朋友呢個煩惱發生。
Nicki Minaj的塗鴉。
影完相，我地就黎左呢間西班牙餐廳MoVida食午餐。
地址：1 Hosier Lane (off Flinders St) Melbourne Victoria 3000
佢嘅分店MoVida Next Door就係隔離炸。
呢度的座位都好寛敞。
首先上左餐包。
叫左一支西班牙黑啤Dougall's Session Stout，AUD$13。
仲叫左支來自巴塞隆拿的啤酒Moritz，AUD$10。
黎到西班牙餐廳緊係食Tapas啦，
Tapas姐係小食，
西班牙都會用Tapas黎送酒。
呢碟係Bistec Tartar，AUD$6.5，
用和牛他他＋鹽醃吞拿魚Mojama放係紫菜餅上面。
Codorniz，AUD$9.5，
鵪鶉塞入雞&蘑菇＋骨髓汁。
頭先食嘅Tapas係細細碟用黎送酒，
而Raciones就係前菜，
適合同朋友一齊share黎食。
呢碟係Pulpo，AUD$30，
燒章魚＋墨汁&蒜油。
Cecina，AUD$25，
風乾和牛＋溫泉蛋&松露泡沫。
店員仲幫我地撈勻d和牛、溫泉蛋&松露泡沫，
佢教我地夾埋隔離碟麵包一齊食。
Pato，AUD$30，
燒鴨胸＋慢煮芹菜根&酸甜醬。
最後甜品當然係食西班牙油炸鬼Churros啦，AUD$12.5。
呢座係墨爾本聖保羅座堂 St Paul's Cathedral, Melbourne，
佢係1891年建成，
係墨爾本的主要地標之一。
之後我地黎左維多利亞州立圖書館 State Library Victoria參觀，
佢係1854年建成，
係澳洲最早的公共圖書館，同埋係世界上其中一間最早免費借閱書的圖書館。
圖書館前面的雕像係當時維多利亞州殖民地法官Sir Redmond Barry，
佢係其中一位提議起呢座圖書館架。
維多利亞州立圖書館有超過200萬的藏書。
好可惜當時因為工程維修，
最出名的La Trobe Reading Room and Dome Gallery暫時關閉！
Photo from https://en.wikipedia.org/wiki/State_Library_Victoria
好多遊客都會黎La Trobe Reading Room睇書之外，
緊係會打卡啦，
今次黎唔到La Trobe Reading Room，唯有下次黎墨爾本再參觀過！
呢個係Redmond Barry Reading Room，
雖然無La Trobe Reading Room咁靚，
但都已經靚過香港嘅圖書館呀。
離開左維多利亞州立圖書館之後，
我地見到座好古老的建築物，
原來係墨爾本皇家理工大學 Royal Melbourne Institute of Technology，
簡稱RMIT University。
呢個咁古老的建築係RMIT的Building 1 (Francis Ormond Building)，
前身係Working Men's College of Melbourne，
係1885年建成。
行行下見到郵筒。
我就寄左d明信片，
呢個街頭表演好似好pro咁。
之後我地就黎左Royal Arcade，
係1870年開幕，
係澳洲現存最舊的商場。
當時Royal Arcade門口有個社會運動，
佢地托住個電視螢幕，
螢幕播住由食物供應商殘暴處理動物的影片，
令我地反思平時食的肉係點樣殘暴殺害得來。
雖然Royal Arcade已經有150年歷史，
但都翻新保存得好華麗，
完全唔覺得有咁耐歷史。
尖東d舊商場望落去仲舊過呢度呀。
Royal Arcade對面就係另一個商場Block Arcade，
係1892年開幕。
Block Arcade同Royal Arcade一樣保存得好好。
Block Arcade最出名的店莫過於呢間The Hopetoun Tea Rooms，
佢係1894年就係Block Arcade開店。
好可惜The Hopetoun Tea Rooms 係2020年12月遷出Block Arcade，
結束整整128年的租約期。
Block Arcade的入口成間酒店咁靚。
我地之後行返去今朝食雪糕個條街，
試下呢間Metro Burgers。
地址：12 Degraves Street, Melbourne, VIC, Australia 3000
點解我地會特登返黎呢，
因為呢度有袋鼠肉漢堡包食！
我地終於食「澳洲菜」啦！
仲有澳洲鴕鳥漢堡包食，
澳洲鴕鳥的英文係Emu，正名係鴯鶓，
係鴕鳥以外世界上最大的鳥類。
亦都出現係澳洲國徽上面，
因為鴯鶓係澳洲獨有的動物黎架。
當時係Happy hour，
啤酒都係AUD$5支。
左面係Strongbow Original Cider，
雖然Strongbow係英國牌子，但Strongbow係澳洲係NSW新南威爾斯州製造嘅。
右面係Cricketers Arms Lager，
係澳洲維多利亞洲製造嘅。
我地叫左兩個都係袋鼠肉漢堡包，
袋鼠肉的肉質比較乾，
覺得始終都係牛肉漢堡包juicy d正d。
薯條AUD$4.9 share一齊食。
食完下午茶，
我地搭Metro去左Docklands，
Docklands的地標就係Marvel Stadium啦，
呢個體育館改過幾次名，包括Colonial Stadium、Telstra Dome、Etihad Stadium，
體育館由2018年9月開始由迪士尼贊助，所以現家就叫做Marvel Stadium啦，
唔知迪士尼唔再贊助之後會改做咩名呢？
Docklands位於沿海的區域，
面前呢個港口叫做Victoria Harbour，
當然無香港的維多利亞港咁大啦。
呢度望到海的感覺好舒適，
我地影返張相先。
係Marvel Stadium隔離見到寫住7Melbourne的建築物。
好大個7字呀，
其實佢係澳洲電視台Channel 7的廣播中心，
叫做Broadcast Centre Melbourne。
住係呢區望住個海都好正。
係墨爾本市區都係見到平地多，
呢度有少少斜路，再加埋電車係度行駛，
有少少三藩市的感覺。
呢度有好多遊艇停泊係度。
行完Docklands，
我地又返去Flinders Street轉tram去表弟屋企。
見到時間尚早，
就去Federation Square 聯邦廣場行下，
呢棟野係Australian Centre for the Moving Image，簡稱ACMI，
係一座同影像、電影有關的藝術館。
呢個休憩的地方就係Federation Square啦。
呢度係勁多白鴿。
一有人掉野食出黎，
成班白鴿就會出黎爭野食。
有隻白鴿叼住野食飛走，
其他白鴿都會追住佢，好搞笑呀。
之後我地就去左Richmond同表弟一家食晚餐。
Day4我地去左有小越南之稱的Victoria Street行下，
今日我地又黎Victoria Street食野！
Day1我地試左好出名嘅越南餐廳 Pho Bo Ga Mekong Vietnam 湄江牛河屋，
今日表姨丈就帶我地黎食佢覺得更好食嘅Cố Đô。
地址：196 Victoria Street, Richmond, Melbourne
炸蝦春卷，Chả giò，AUD$9。
用生菜包住炸春卷，再點魚露食。
之前去胡志明市愛上左凍啡奶，
黎到墨爾本都要整返杯。
燒遮蝦米粉，Chạo tôm，AUD$12.5，
遮蝦係將蝦肉打到起膠，再包住條蔗炸熟整成嘅。
食的方法都係用香葉包住米粉&遮蝦，再點魚露食。
呢碟係香葉牛肉卷米粉 Bò lá lốt，AUD$12.5，
香葉牛肉卷係用葡萄葉包住牛肉，再拎去燒整成嘅。
食的方法都係用香葉包住米粉&香葉牛肉卷，再點魚露食。
蝦米粉卷，Gỏi Cuốn Tôm，AUD$9。
順化牛肉粉，Bún Bò Huế，AUD$10，
入面有豬肉、牛肉，豬紅。
呢個係肉絲米粉卷，Bì cuốn，AUD$9。
雞肉河粉，Phở gà，AUD$10。
大家都唔陌生嘅越南河粉。
呢個係越式煎餅，Bánh xèo，AUD$17，
外皮煎得好香脆，
入面有芽菜、豬肉、蝦等等。
最後一碟係蕃茄蝦醬湯米粉，Bún riêu，AUD$11，
入面有蟹肉、蕃茄、豬紅、豆卜、蝦醬等等。
呢個《去墨爾本玩》之旅最後一餐，
好滿足呀！
係呢條Victoria Street的Woolworths見到有亞洲菜賣，
仲會有介紹添，好貼心呀。
食完野行完街，我地就返酒店拎行李，
再去機場返香港啦。
我地今晚搭維珍澳洲航空1:20am的機返香港啦。
同去程一樣，機上娛樂係舊式有個搖控控制個mon個款，
有touch mon功能，但感應好差。
當時太攰影到好濛添，
同去程一樣，有過夜包、一支水、毛氈。
一樣係會派發menu，
可以諗定晚餐&聽朝早餐食咩！
另一面係drink list。
晚餐我揀左港式雞肉咖喱配香米飯&炒蔬菜，
有個法包仔，
仲有澳洲Mainland牌的車打芝士&餅乾，好好食！
安迪揀左蔬菜燉牛肉配薯蓉&春季蔬菜，
甜品係Wicked Sister的Rice Pudding Creamy Coconut(椰子米布甸)，
椰子味好味濃，夾埋甜甜的米布甸，勁好食，
食完可以訓個好覺啦。
墨爾本的夜空。
機程大約係9小時40分鐘，
訓左大約5個鐘又夠鐘食早餐啦，
我揀左意式煎蔬菜蛋餅配藜麥炒薯仔&澳洲地道嘅tomato relish醬。
安迪揀左炒福建麵配蔬菜&蔥，
仲有香蕉白朱古力鬆餅、Chobani的士多啤梨希臘乳酪。
8:10am到達香港啦。
呢程機最印象深刻的係機上有個鬼佬空叔 (中年男空中服務員)，
上飛機個時侯同每位乘客講"早晨"，
仲用廣東話指示乘客佢嘅座位係邊，
落機個時侯又會同乘客講"再見"，
雖然佢D廣東話唔正，但氹得乘客好開心呀。
整整7日的《去墨爾本玩》就完結啦，
下篇blog會講下住左6晚的酒店啦。
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
0 comments