5月14日：早：De Broodzaak & Dunkin' Donuts -> Giethoorn 羊角村 -> 午：Grand cafe Fanfare -> Dam Square 水壩廣場 -> Hash Marihuana & Hemp Museum Amsterdam 阿姆斯特丹大麻博物館 -> Red Light Secrets Museum of Prostitution 紅燈區秘密博物館 -> 晚：Manneken Pis Amsterdam -> 宵夜：Coffeeshop De Kroon 大麻咖啡店
今日我地一早起身，
離開阿姆斯特丹，出發去Giethoorn 羊角村！
我地今日10:00am就出發，
首先去阿姆斯特丹中央車站Amsterdam Centraal Station搭火車。
琴晚影左夜景，
今日影個日景比大家睇啦。
我地係火車站買啲野食做早餐，
香港好少有冬甩店，
旅行見到冬甩都會想買黎試，
呢間係美國牌子Dunkin' Donuts。
個人覺得Krispy Kreme嘅冬甩望落去吸引過Dunkin' Donuts。
我地仲黎左呢間荷蘭連鎖麵包鋪De Broodzaak買早餐。
我地會搭去Almere Centrum站，
然後轉另一架火車到Zwolle站，
再轉火車到Steenwijk站。
我地預先係https://www.discoverholland.com度買左去來回Giethoorn火車飛同Giethoorn觀光船嘅套票，
價錢係€26一個人，
然後就有個火車飛嘅voucher code比你去買火車飛，
跟住就可以上荷蘭鐵路嘅官網https://www.ns.nl/producten/en/losse-kaartjes-toeslagen 換定Amsterdam Centraal Station去Steenwijk嘅火車飛，
火車飛價值係€19.95一個人。
分享下我地頭先買左咩早餐啦，
係De Broodzaak店買左Gevulde Koek，€1.60，
係荷蘭嘅杏仁撻，幾好食！
仲買左一杯Caramel Cappuccino，€3.10。
Dunkin' Donuts買左2個冬甩，
左面係Strawberry，入面係士多啤梨餡，€2.25，
右面係Peanut Butter，面頭係花生醬，入面係士多啤梨餡，€2.25。
總共搭左個半鐘多啲就到左Steenwijk站，
然後搭70號巴士或者270號巴士Giethoorn嘅方向到Dominee Hylkemaweg站落車。
終於黎到羊角村啦！
羊角村係荷蘭最靚嘅村莊，
被譽為「荷蘭嘅威尼斯」，
對於去過威尼斯嘅我黎講，羊角村係有種童話小鎮嘅感覺，
威尼斯比較殘舊，太多遊客了。
不過羊角村就細好多，但遊客都相對少好多，好舒服。
呢啲大船係觀光船。
係呢個咁靚嘅羊角村打個卡先。
今日天公造美，個天冇咩雲。
有啲屋嘅外面有長凳比人坐。
建議大家可以行上坐木橋上面。
因為可以從高處睇呢個靚靚嘅牛角村。
除左觀光船之外，
遊客都可以租船仔自己撐。
羊角村都會有啲小店比人行下，
呢間係賣本地製作嘅芝士。
我地就買左舊山羊造嘅芝士，
係Gouda cheese豪達芝士黎，起源於荷蘭豪達嘅一種芝士。
羊角村嘅河流上除左有船，
仲有鴨仔。
呢個品種係綠頭鴨 Mallard。
1:00pm，我打算先坐觀光船睇熟啲水路，
之後先至租船自己揸。
呢個觀光船嘅船程係一個鐘。
而觀光船嘅飛就係文章開頭講過，
我地係網上買定來回Giethoorn火車飛同Giethoorn觀光船嘅套票。
羊角村周圍都係河道，
陸地之間由橋連接。
呢度嘅每間屋都各有特色。
啲花開得好靚呀。
呢間屋好有童話故事feel。
呢間屋嘅外牆種滿植物，
我鍾意佢個窗框係用紅色。
又見到綠頭鴨啦。
呢堆屋嘅style全部一樣，
都係好modern嘅感覺，
似係租比遊客住嘅屋。
呢間屋有種三隻小豬入面嘅茅草屋嘅feel。
發現到綠頭鴨一家。
綠頭鴨爸爸係隊頭，
綠頭鴨媽媽係隊尾，
帶住一堆鴨仔係呢條河度游。
觀光船其實會有個導遊介紹羊角村，
但我地已經唔記得左佢講左啲咩啦。
呢度竟然有樹屋！
好想上去參觀下。
一個鐘嘅船程好快就完結啦。
落左船之後，我地就周圍行下影相啦。
呢度真係好似童話故事咁靚。
下次再黎羊角村唔知有冇機會係呢啲屋仔住一晚。
之後我地就黎左呢間Grand cafe Fanfare食lunch。
地址：Binnenpad 68, 8355 BV Giethoorn The Netherlands
嗌左一杯荷蘭本地啤酒牌子Grolsch出嘅小麥啤酒Weizen，30cl，€4.80。
仲叫左支羊角村本地嘅啤酒牌子Geyt Bier出嘅Gekkigeyt，€4.80，
係Tripel啤酒黎嘅，口感複雜多變。
沙律係必需嘅！
我地叫左Volendam Eel沙律，€14.75，
上面有荷蘭福倫丹嘅鰻魚，
d鰻魚好軟滑，好好食。
主菜方面，我叫左Homemade Fanfare beef burger，€16.50，
有松露薯條，
仲有碟沙律仔同他他醬係薯條後面。
比安迪嘅chok樣大家睇下啦。
安迪點左Roastpork，€19.50，
啲豬肉係來自附近嘅農場，
用左蜜糖同黑糖醃製，然後用62°C慢煮而成，
仲加左€2.50蘑菇汁淋係面，
好好食呀。
連埋服務費同稅，成餐總共食左€62.85。
食完野我地就行下啲手信店，
呢間鋪頭門口有好大對木屐 Klompen，
荷蘭木屐、風車、鬱金香合稱為「荷蘭三寶」，
因為荷蘭位於低洼嘅地區，
周圍都係河流，所以荷蘭嘅農夫都會著木屐保護隻腳。
我地終於租船試下自己揸船啦，
揀左黃紅色呢架細船，
佢係靠船頭嘅摩打去郁動。
呢個係羊角村河流嘅地圖，
交叉個點就係我地上落船嘅地方。
1號河道去5號河道需要1小時，
黃色路線需要2小時，
紅色路線需要3小時，
而綠色路線需要2.5小時。
安迪隻手就放左係摩打上而控制。
好愜意呀。
係船上面影相都好靚，
建議大家黎羊角村都要試下揸船呀。
揸完船我地就返去阿姆斯特丹啦，
黎左水壩廣場 Dam Square睇下。呢碌柱係國家紀念碑，1952年建成，係紀念第二次世界大戰衝突所造成嘅傷亡。
紀念碑前面其實有兩個獅子石像(我剩係影到其中一個)。
紀念碑上面有四位被鐵鏈鎖住嘅男人雕塑，佢地代表二戰其間遭受嘅苦難，
左右兩則各有一位男人雕塑同一隻哀鳴緊嘅狗，
左面嘅男人代表知識分子嘅抵抗，右面代表工人階級嘅抵抗，
狗就代表苦難同忠誠。
最後佢地嘅上方有一位女人抱住一個小朋友嘅雕塑，
代表勝利、和平同新生活。
左面呢座係Royal Palace of Amsterdam 阿姆斯特丹王宮，係1648年建成，
而家係由現任荷蘭國王Willem-Alexander使用。
右面有個尖頂個座係Nieuwe Kerk 新教堂，係1409年建成。
阿姆斯特丹市中心呢度基本上每條街都有間Museum博物館，
啲博物館都係要比錢入場，
未必間間都值得入去睇架。
呢間Cannabis Museum Amsterdam 網民就話入面冇乜野好睇啦，
但博物館入口出面係一個精品店，
有啲大麻產品賣，例如有大麻朱古力、大麻蛋糕等等，
大家都可以去睇下啲大麻產品。
兩排建築物之間嘅運河就係阿姆斯特丹標誌嘅構圖啦。
如果真正想認識大麻嘅歷史就要黎呢間Hash Marihuana & Hemp Museum Amsterdam 阿姆斯特丹大麻博物館。
地址：Oudezijds Achterburgwal 148, 1012 DV Amsterdam
入場費係€9，
張飛都好靚呀。
呢度有好多唔同語言嘅麻字。
自古以來世界各地都有人吸食大麻。
係流行文化都會發現到大麻嘅蹤影。
好多有大麻出現嘅物件。
呢度有個細小嘅大麻花園，
可以睇到大麻植物嘅樣貌。
呢度仲有啲大麻嘅產品賣，
例如大麻茶、CBD油、CBD電子煙油等。
頭先張入場券仲可以黎Hash Marihuana & Hemp Gallery 大麻畫廊度參觀，
但我地就冇入去睇啦。
天開始入黑，我地就黎世界上最著名嘅紅燈區 - 德瓦倫De Wallen見識下。
呢度嘅性工作者都會著得好性感咁企係後面櫥窗婀娜多姿，
但大家牛咁眼咁欣賞性工作者嘅時候，記得唔好近距離凝望櫥窗太耐，
會令人覺得你唔尊重佢地，
而且係唔可以影性工作者架，
所以建議大家好似我地咁係橋上面遠距離影好啦。
紅燈區最多人嘅地方就係Red Light Secrets Museum of Prostitution 紅燈區秘密博物館啦，
門口有條長龍入去呢間博物館參觀，
了解多啲紅燈區背後嘅故事！
入場費係€14.5。
地址：Oudezijds Achterburgwal 60h, 1012 DP Amsterdam
冇影到博物館外面成個嘅樣，
呢段片係官方拍嘅，
博物館入面可以比你體驗下企係櫥窗入面嘅感覺。
入場有本小冊子，入面嘅內容都好豐富，
有紅燈區嘅歷史、小知識咁，
書後面仲寫呢本野值€2.95！
另外，仲有部audio guide聲音導遊講解呢個博物館添。
博物館入面模擬返一啲性工作者開工嘅房。
博物館入面都有啲暗，
所以影得比較差，
呢張床都幾有情調。
仲有SM房添。
呢個性感嘅女郎嘅頭其實係安迪黎架，
係咪毫無違和感呢？
呢度仲有啲名人同性工作者有關嘅新聞，
呢單新聞就有個性工作者爆料Justin Bieber係巴拿馬酒店房叫左10隻雞！
呢度嘅精品店好多特別嘅condom，€1.50
可以買黎返香港做手信。
博物館出口個度有幅牆，
可以比遊客告解自己鹹濕嘅罪行，
發現到一個中文嘅告解好搞笑，
應該都係香港人寫嘅。
大家有冇留意我地未食晚餐？
因為lunch係羊角村食到好飽，
晚上決定食酒店樓下呢間薯條店 Manneken Pis Amsterdam，
佢係荷蘭有好多間分店。
地址：Damrak 41, 1012 LK Amsterdam
張相係日頭個陣影架。
呢間薯條店好吸引嘅地方係有好多醬比人揀。
薯條有3個size比人揀，
印象中我地揀左中size，
每款醬€0.90，
店員都落得好多。
仲有3款粉比你任加添。
仲買左條芝士條，€1.95，
我覺得仲好食過啲薯條！
食飽之後，我地就去荷蘭獨有嘅coffeeshop(大麻咖啡店)度見識下啦，
黎左酒店附近呢間Coffeeshop De Kroon。
地址：Oudebrugsteeg 26, 1012 JP Amsterdam
好多品種嘅大麻呀，
我地都揀啲Pre rolled joint 已經捲好嘅大麻煙，
因為我地唔識自己捲煙，又冇捲煙紙同濾嘴，
所以買Pre rolled joint試下就算，€10，
仲叫左支可樂，€4。
可能呢啲pre rolled joint嘅大麻品種比較差，
而且我地又唔識食煙，
所以食完成支都冇乜feel！
好失望！
我地聽日再試下其他荷蘭先可以食嘅野啦。
旅遊日期：2019年5月11日- 2019年5月20日
=========================
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
《西歐四國遊》
0 comments