係台北第二日行程
Day2: 平溪(放天燈)->菁桐->九份->饒河街夜市
第二日的行程都係有好多要注意的野，所以我都分左兩part黎打。
－－－－－－－－－－－－－－－－－－－－－－－－－－－－－－－－－－－－－－－－
由於Day 1搭早機黎台北無乜點訓過，而且又行左好多路，所以我地今日連酒店早餐都無食，補眠訓到11點半先起身，食左琴日買的Donut同7仔溫泉蛋做早餐，最後成1點先出門口。(唔補眠點會有精神去玩呀？休息是為了行更長的路嘛 ;-) )
7仔溫泉蛋NT$38，幾好味！
1.捷運去台鐵
之後我地由西門搭捷運到台北車站，雖然捷運同台鐵都係台北車站，但係要係捷運出閘，行去台鐵的閘口，然後再拍悠遊卡入閘，先搭到台鐵。
2.台北車站去平溪線
係台北車站係無台鐵直達平溪線的，所以要係台北車站搭台鐵去瑞芳，然後轉另一架台鐵去平溪線。
＊我當時手上本2014-2015年版的旅遊書話八堵可以轉乘平溪線，但其實八堵已經無台鐵直接去平溪線，所以各位要留意下自己本旅遊書的資料係咪最update! (包括呢篇blog呀！)
當時去到台鐵，見到電子版show左好多架upcomming的車，架架去都唔同的地方，我地當時好亂，唔知搭邊架好！最失敗我地事前無上網check好搭幾點邊架車，搞到我地浪費左一段時間去研究，miss左架經瑞芳的車，再下一架經瑞芳要等成半個鐘！與其係台北車站到呆等半個鐘，我地搭左架就快開而且經八堵的車，先坐陣台鐵，係八堵落車再等去瑞芳的車。
大家唔好犯我同樣的錯誤，記得旅行前一日上http://twtraffic.tra.gov.tw/twrail/ check定台鐵班次！禁"快速查詢" -> 起程站揀"臺北" -> 到達站打"十分／平溪／菁桐"(視乎你想去邊個站) -> 揀日期同時間 -> 禁"查詢"。
然後就會出班次時間，各位記得準時到達車站！等下一架有時好耐架！
係八堵等左20分鐘車，無聊之下就係同男朋友影相啦。
我地發現八堵車站的柱都幾特別，呢碌柱就畫左D天燈係上面。
係八堵車站等左成20分鐘終於有車去瑞芳，然後係瑞芳狗沖轉另一架台鐵去平溪，因為仲有2分鐘就開車，搭唔到呢架又要有排等啦。好彩我地都上到車，最後4點先去到平溪。
3.平溪
我地一落車就落雨啦，真係唔好彩！不過都唔係落左好大，仲可以放到天燈。
一落車就係間天燈店買左2個祈福小天燈，我同男朋友每人一個，每個NT$70，有唔同的字同天燈的圖案揀。
買左之後發現原來"十分幸福"個牌仔後面寫住"天賜良緣"。
係間男人開的天燈店度放天燈NT$150，貪佢無乜人幫襯唔洗排隊。
(特登遮左呢面我地寫左D乜)
放左兩分鐘之後已經飛到好遠啦，慢慢已經見佢唔到。
當時4點半到，但大部分的店鋪都已經收左。
有D肚餓所以買左故事腸黎食，每條NT$35，左面原味，右面黑胡椒味。
4.菁桐
食完腸，我地就沿住鐵路隔離的行人路行去菁桐，都行左大概25分鐘。
點解唔搭台鐵去菁桐？
因為當時一個鐘先有一班台鐵去菁桐，而且以為一個站好近啦，原來都要行好耐。
係菁桐買左支許願竹NT＄40，係上面寫D願望，然後掛起佢。
當時落緊雨，其他許願竹都濕哂，我地新掛上去的許願竹迥然不同。
掛完許願竹我地就離開菁桐，出發去九份啦。準備搭台鐵個陣發現菁桐無悠遊卡拍卡機，但係平溪係有架。我地諗住買飛啦，但售票處已關，既然無閘口我地唯有照上車，打算去到瑞芳問下職員點補飛啦。但點知坐坐下台鐵的時候有職員Check飛，我地話我地從菁桐去瑞芳，職員就幫我地落車買飛啦，車票NT$29。
*其實大家可以搭平溪線的鐵路之前係瑞芳買平溪線一日週遊券NT＄52，就可以一日之內係平溪線各站無限次上落架啦。
旅遊日期：2015年1月5日至1月8日
=========================
| 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update！ |
其他文章：
去台北嘆 之 解謎篇
去台北嘆 之 酒店篇 (台北西門町,豪景大酒店)
去台北嘆 之 Day1a (中華航空,機場巴士,台北車站,電話卡)
去台北嘆 之 Day1b (漁人碼頭,情人橋,淡水老街,士林夜市)
去台北嘆 之 Day2a (平溪,放天燈,菁桐,許願竹)
去台北嘆 之 Day2b (九份,饒河街夜市)
去台北嘆 之 Day3 (忠孝敦化,台北車站,西門町,度小月,Dazzling Cafe,阿毛)
去台北嘆 之 Day4 (松山文創園區,誠品生活松菸,美麗華摩天輪,Bigtom)
去台北嘆 之 購物篇 (化妝品,護膚品)
《去台灣嘆》系列
一家去台北 之 住宿篇 (西門町,愛客發時尚旅館)
0 comments