係台北第三日行程
Day3: 忠孝敦化站-> 台北車站-> 西門町
－－－－－－－－－－－－－－－－－－－－
頭兩日的行程都比較chur，所以今日就hea d。
7點起身食個酒店早餐（酒店早餐食評請睇去台北嘆 之 酒店篇 (台北西門町,豪景大酒店)），之後就番房再訓到11點先出門口。
1.忠孝敦化站
我地首先搭捷運到忠孝敦化站，去度小月食野。度小月雖然門面好靚，但D野食唔貴，而且好好食，黎台灣的你一定要黎試下呀！
度小月的Menu，我無影哂全部menu，剩係影左我有落單個兩頁。
點左4樣野，另外收加一服務費，總共食左NT$556。
龍蝦卵河粉卷，NTD$200。有D似壽司卷，但唔係包住飯，而係用河粉同紫菜包住龍蝦卵、肉鬆、蒜芯等。好好食，推介！
擔仔麵(湯)，NT$50，都幾好食。
祖傳肉燥飯，NT$35。真係好正，D肉燥好好味！而且好平，加埋服務費計番港紙10蚊都唔洗，一間裝修得咁靚的餐廳，竟然有樣咁平的食物，真係unbelievable！
現烤胡椒肉，NT$220。豬肉黎，烤得好正，食完一塊又一塊，食到停唔到口。
食完Lunch就係去左郵局寄明信片，郵局係度小月附近隔一條街only。（寄明信片的郵費同資料請睇去台北嘆 之 解謎篇）寄明信片好簡單，去郵局排隊買郵票，貼好郵票，拎去門口的郵箱寄就得啦。之後係忠孝敦化D店鋪行左陣就走啦，我覺得個度無乜野好行就轉戰台北車站。
2.台北車站地下街
去到台北車站首先行下台北車站的地下街，相比忠孝敦化的地下街，我覺得台北車站的地下街多野行D。
係地下街一間鞋鋪買左對平底鞋NT$390，對鞋同旺角D鞋的價錢差唔多，但呢對鞋係台灣造，made in Taiwan，D料實'正'過D大陸鞋，而且個底有軟墊，著得好舒服。
著左一個月對鞋有多，因為淺色都幾易烏嘈，而且我著鞋都幾粗魯。
By the way，好後悔無係台灣買多一兩對鞋，台灣D鞋用料好，手工好，無咁易著爛。
男朋友個喼的手抦壞左，所以係台北車站地下街買左個喼，NT$1480，好似係24吋，都好抵買！
我仲係地下街的屈臣氏同康是美買左D化妝品，遲D會出篇文章詳細介紹我係台灣買的化妝品。
3.新光三越 &光南大批發
之後去左新光三越台北站前店的地庫2樓，去太陽堂老店買太陽餅。
食哂無影到相。太陽堂老店太陽餅NT$300，有12件。我覺得太陽堂老店的太陽餅好食過李儀的。
係新光三越的超級市場買左盒黑糖，台灣尋味錄原味黑糖25g NT$75，當糖黎食甜甜地。
行完新光三越，就去附近的光南大批發啦，光南大批發有3層，最底層係賣CD，上一層賣文具，最高層賣化妝品同護膚品，最後買左盒凍膜同DVD，想知盒凍膜好唔好用，請睇。
4.微風台北車站
之後就去左微風台北車站1樓的Dazzling Cafe食Tea，其實當時都已經7點啦，但仲未想食dinner。
Dazzling Cafe的裝修好靚，比人一種高貴典雅的感覺。
坐位都幾舒服好坐，適合幾個朋友係度傾下計。
草莓繽紛冰淇淋鬆餅NT$230，另加左麻糬係鬆餅入面＋NT$20，總共NT$250。加左麻糬口感煙韌，都唔錯啦。
秋煥葡萄果香冰冰茶NT$140。
蔓越莓蘋果茶NT$140。
兩杯野其實都無乜特別淡淡地有D生果味，我覺得秋煥葡萄果香冰冰茶好飲D，蔓越莓蘋果茶實在太淡味。
每人最少要叫一杯野飲，另外要收加一服務費。我覺得D野飲就麻麻地，所以黎Dazzling Cafe食野最少叫杯野飲都幾唔抵。
又買左Mister Donut黎試，真係好食呀。
5.西門町
之後就搭捷運番西門町，去阿毛食Risotto。
唔記得記底食左D乜野，只係記得D Risotto都幾好味，而且D Risotto好特別，係放係石鍋上面再加塊多士係面。總共食左NT$340。
門口有兩隻金毛尋回犬，佢地工作左成日，似乎已經好攰。但我地臨走個陣，站員帶佢地出去散步，佢地即時生猛番哂。
係西門町大街試飲左D黑糖茶，覺得幾好飲，就買左包薑大師黑糖紅棗桂圓茶NT$200，有10包。佢仲有好多唔同的黑糖茶，我買左黑糖紅棗桂圓茶，因為女性經期後飲紅棗桂圓對身體好，而且味道岩我。
係附近暗行仲買左件牛肉饀餅NT$30，味道麻麻，無影到相。
另外仲係巴黎草莓同屈臣氏買左D化妝品，都會係篇化妝品文介紹買左D乜。
最後就番酒店休息啦。
旅遊日期：2015年1月5日至1月8日
=========================
| 覺得呢篇blog幫到你， 記得like Facebook Page https://www.facebook.com/fatbjai.travel/ follow Instagram https://www.instagram.com/fatbjai.travel/ 收到個blog的最新update！ |
其他文章：
去台北嘆 之 解謎篇
去台北嘆 之 酒店篇 (台北西門町,豪景大酒店)
去台北嘆 之 Day1a (中華航空,機場巴士,台北車站,電話卡)
去台北嘆 之 Day1b (漁人碼頭,情人橋,淡水老街,士林夜市)
去台北嘆 之 Day2a (平溪,放天燈,菁桐,許願竹)
去台北嘆 之 Day2b (九份,饒河街夜市)
去台北嘆 之 Day3 (忠孝敦化,台北車站,西門町,度小月,Dazzling Cafe,阿毛)
去台北嘆 之 Day4 (松山文創園區,誠品生活松菸,美麗華摩天輪,Bigtom)
去台北嘆 之 購物篇 (化妝品,護膚品)
《去台灣嘆》系列
一家去台北 之 住宿篇 (西門町,愛客發時尚旅館)
0 comments