日本

去東京玩 Day6 (淺草附近超正鰻魚飯推介 - 鰻禅)

By 曳豬到爆炸 - 6月 16, 2020


～今日的行程～
4月17日：午：鰻禅 (鰻魚飯) -> 新宿伊勢丹  ->   下午茶：Kitchen Origin (便當) -> 成田機場


Day4個日趕住著和服無排隊食到鰻禅，
於是我地今日最後一日係東京，
check out左酒店之後，
都特登搭黎本所吾妻橋站食鰻禅。


鰻禅11點鐘先開鋪的，
今日係星期二，人流明顯比星期日少呀。
地址：東京都墨田区吾妻橋3-6-18

有三種size揀，分別係上、特上、2段重。
鰻禅入面座位唔係好多。

店員首先上左碟漬物。
鰻魚即叫即整即燒，
我地等左50分鐘先至上鰻魚飯呀。

我地叫左特上鰻魚飯，3500円，
塊鰻魚燒到個邊係脆嘅，
味道好濃郁，
d飯同鰻魚汁的比例岩岩好，
唔會食到白飯的情況出現！！
係我食過的鰻魚飯中最高質的！
仲有碗鰻魚肝湯飲添。


食飽之後，
我地就番去新宿行街街&去郵局寄明信片啦，
好唔好彩有一張寄失左。

我地去左新宿間伊勢丹Isetan百貨公司買野，
點知比我地發現到來自法國的Jean-Paul Hévin，
我地上年去巴黎錯過左呢間朱古力店，
有幸比我地係東京相遇番！
(之前咪講過Jean-Paul Hévin係2016年就撤出左香港嘅，
前排係IFC間Citysuper見番Jean-Paul Hévin！
但疫情關係得包裝的朱古力賣。。。)
我地買左盒朱古力＆Macaron，
店員用保溫袋包成咁。
Macaron的包裝係一個軟紙盒，
外面用絲帶包住。
入面再有一張繪畫圖案的牛油紙包住Macaron。
我地買左8粒Macaron，270円一粒(未連稅)。
呢盒係朱古力，
佢個盒硬整d，
同樣都係有絲帶包住。
有4粒朱古力，1556円一盒(未連稅)。
連稅後，朱古力&Macaron加埋係4013円。

我地仲去左呢間仙太郎買和菓子。


我地買左三粒和菓子，

  • 水無月(白)，210円(未連稅)，即係三角形，上面係紅豆，下面係白色個件。個人覺得呢件係三件之中最好味。
  • 葛桜，180円(未連稅)，即係有塊葉包住個件，其實係用葛粉整成半透明的皮包住d紅豆餡，再係外面包住一塊櫻葉。呢件都好香，幾好食。
  • 剩底白色個粒叫おまん，400円(未連稅)，係用麵粉團入面包住d豆沙餡。
連稅後，加埋係853円。

Photo from Google Map
最後，我地黎左酒店&大久保附近的呢間Donki Donki驚安之殿堂shopping，
臨去機場的最後衝刺。
間鋪頭的位置係紅色箭嘴的方向。
(Donki Donki終於係2019年係香港開鋪，
想必大家都會比Donki的歌洗腦啦。)

我地係酒店拎左行李之後，
就去左酒店附近的呢間Kitchen Origin買便當，
然後係搭Skyliner個陣食。

入面好多現成便當揀，仲有自選的便當添。
另外，仲有即時製作的便當賣，
我地當然揀左即時製作的便當啦。

男友個盒係他他醬紫菜明太子炸物便當，470円。
我個盒係豬頸肉丼，490円。

我地同去程差唔多，
首先搭地鐵去上野御徒町站，
再行地下隧道去京成上野站，
就有得搭Skyliner直達成田機場啦。

我地會搭HK Express 7:45pm個班機番香港，
HK Express零零捨捨要行去閘口F度check in。

入到黎閘口F呢度，原來都好多人架。



Photo from https://www.fasola.jp/zh-tw/search/floor-map/no2/akihabara.html
入左禁區之後有間Fa-So-La TAX FREE AKIHABARA免稅店，
人頭湧湧，幾乎好似年宵咁迫，
排隊比錢都要排長龍呀，
趕住登機真係唔洗指意買到野呀。
之後我地發現近登機閘口的Blue Sky免稅店，
雖然比Fa-So-La細間，但係人少少，行又行得舒服好多，
而且Royce朱古力的款式係最齊全呀！！！

買完野我地就行去登機閘口啦。

大家都知香港快運航空係無飛機餐食嘅，
醒目的日本仔就係廉航的閘口隔離開左間野食檔！

我就買左個熱狗上機食，360円。

男友就堂食個咖喱飯，880円。
上機打開個熱狗係咁嘅樣架！





旅遊日期：2018年4月12日- 2018年4月17日










=========================
覺得呢篇blog幫到你，
記得like Facebook Page  https://www.facebook.com/fatbjai.travel/
follow Instagram: fatbjai.travel
https://www.instagram.com/fatbjai.travel/
收到個blog的最新update！

  • Share:

You Might Also Like

0 comments