10月14日： 香港機場 -> 墨爾本機場 -> Flinders Street -> Richmond -> Brighton Beach 彩虹小屋 -> St. Kilda Beach -> 下午茶：Paper Fish -> 晚：Pho Bo Ga Mekong Vietnam
我地今次會去7日6夜的澳洲墨爾本Melbourne，
係我地第一次去澳洲呀！
而且可以順道探望住係墨爾本的親戚。
提提大家去澳洲係要電子簽證架，
持有香港特區護照可以申請電子簽證ETA，去呢個網申請，價錢係AUD$20。
持有BNO英國國民(海外)護照唔可以自己係網上申請ETA架，只可以透過香港旅行代理或航空公司代辦ETA申請。
而ETA的有效期係一年，一年內可以多次進出澳洲！
我地最後係一年內去左兩次澳洲旅行，
當時香港主要有3間直航去墨爾本，
分別係國泰航空(Cathay Pacific)，澳洲航空(Qantas) & 維珍澳洲航空(Virgin Australia)，
我地就買左3間之中最平嘅維珍機票!
價錢連稅每人要HKD$4038。
可惜係2020年2月11日起，維珍澳洲航空取消墨爾本來往香港的航線，
而且係2020年3月開始仲退出埋香港所有航線服務添！
香港失去又平、服務又好的維珍澳洲航線，真係可惜！
Check in左之後，我地就去左T2的環亞Arrivals Lounge食下野&沖涼啦。
可惜因為起三跑，T2要暫時關閉，Arrivals Lounge都因而係2019年11月4日關閉左啦。
我地將會搭9個半鐘的飛機，
去到墨爾本會係朝早8:20am，
所以我地就係lounge度沖返個靚涼先上機啦。
沖完涼就入閘啦，
我地班飛機會係7:50pm起飛。
聽人講維珍的機都比國泰&Qantas窄，
的確座位都真係窄少少。
我地坐的機型係A330-200，
座位分布係2-4-2，
姐係窗邊只有兩個座位，
中長途機黎講係一流，
坐窗邊的我唔洗跨過第三個人先去到廁所。
座位放左支Danone的礦泉水，
唔洗擔心訓教個陣無水飲。
仲有個headphones。
有枕頭。
坐econ竟然有過夜包。
入面有眼罩、耳窿、筆，
無筆的乘客唔洗問空姐借筆啦。
機上娛樂大部分都係D未聽過的戲，
(無係香港上映過所以可能唔認識)
新片當時都有2-3套，例如:侏羅紀世界：迷失國度、超人特攻隊2。
我就睇左Life of the Party(2018)、Absolutely Fabulous: The Movie (2016)，
安迪就咩都唔岩睇。
另外，佢係舊式有個搖控控制個mon個款設備，
雖然有touch mon功能，但感應好差。
空姐會預先派發menu比你睇，有晚餐同早餐食。
酒都有得揀呀。
我揀左芥末籽醬燜雞肉。
安迪揀左牛胸肉咖喱配茉莉香米飯。
仲有Bega的Strong & Bitey芝士、Arnott's的餅乾，
芝士夾埋餅黎食好好味。
我覺得最正係Lily O'Brien's的Dark Chocolate Butterscotch Mousse(黑朱古力牛奶糖果慕絲)。
雖然係慕絲，但好似食緊雪糕，但個感覺係實在d，
好好食呀。
安迪叫左澳洲的啤酒Carlton Dry，
而我就叫左Schweppes的Lemonade。
機上太乾淨啦，
要帶返支補濕噴霧噴下塊臉。
可能晚餐好豐富的關係，早餐的時候都好似仲飽飽地，食唔落野咁呀。
安迪揀左西式炒蛋配五花煙肉、薯餅、番茄醬。
我就揀左雞肉粥，
另外，仲有雀巢的乳酪、cupcake添。
琴晚連續地訓左應該都有5個鐘，
而且飛機好穩，一直都冇乜遇到氣流。
今次都帶左隻熊仔去旅行。
就快降落了。
一片綠油油的田。
今日墨爾本的天氣都好好呀。
班機早左10分鐘降落墨爾本。
我地要搭接駁巴士去機場，
途中影左呢架Jetstar。
過關的時候有呢d叫做SmartGates的自助機，
只需要插入護照、回答小量問題，
佢就會出張飛仔比你。
我手上呢張就係張飛仔啦，
然後用呢張飛仔去閘門度拍，然後影相，
就可以去拎行李啦。
成個過關的速度加快左。
拎行李的時候拎左呢本比旅客的小冊子，
入面有d旅遊景點、博物館的的優惠券，
都幾岩洗。
墨爾本Tullamarine機場的接機大堂。
我地call左uber去酒店，
雖然接機大堂出面就係馬路，
但係我地要行去public pickup度搭uber。
跟住指示就黎到public pickup的area，
uber司機只可以黎到呢度接客架。
我地住係位於Flinders Street的Rendezvous Hotel Melbourne，
之後嘅blog我會再詳細review。
當時係朝早10點，
酒店可以咁早check in間房，
於是我地放低行李喼去表弟屋企啦。
係墨爾本的市區(澳洲會叫做CBD，即Central Business District)會經常見到Tram電車站架，
有個Free Tram Zone的區域係免費搭電車架，
我地搭Tram 75去Richmond啦。
Richmond非常近CBD，車程只係15分鐘！
黎到墨爾本的第一餐竟然係表弟煮雞肉河粉比我地食！
我地食完午餐就沖個涼、訓一陣先啦，
畢竟我地琴晚係飛機上只係訓左5個鐘，好攰呀。
我地間酒店3點先至可以check in，
於是我地3點返去Flinders Street check in，
然後就去第一個景點Brighton Beach啦。
呢個就係墨爾本最繁忙的車站 - Flinders Street Railway Station，
佢係1854年建成，個建築物都keep得好好，非常靚呀。
我地會搭火車去Brighton Beach。
我地搭Sandringham line去Brighton Beach站落車。
跟住地圖行10鐘到就見到呢d Brighton Bathing Boxes (中文䁥稱為彩虹小屋)，
呢度總共有82間bathing box，
早於1862就出現係Brighton Beach啦，
佢係用黎換衫、遮風擋太陽、放雜物架。
係Brighton Beach除左有彩虹小屋外，
仲有好多海鷗！
超多遊客黎打卡呀。
呢度每間屋仔都有唔同顏色。
仲有唔同的圖案，
呢間就有澳洲的袋鼠啦。
呢間藍色tone好有海灘feel。
呢間澳洲國旗的屋係最打卡able啦。
男子組的合照。
當然唔少得我的自私照啦。
沙灘的凹陷位形成左一個湖，
好多海鷗係度游 lol。
影完相我地就去下一個景點啦，
行去火車站的途中見到Brighton d屋都裝修得好靚，
好有我的dream house的感覺！
之後我地搭Sandringham line去Balaclava站，
再轉Tram 16去St Kilda Beach。
Luna Park Melbourne係歷史悠久的主題公園，
係1912年就已經開幕啦。
見到門口有架雪糕車。
係Gelato黎，即係意式雪糕，
特別之處係d雪糕所含有的空氣比普通雪糕低，
所以雪糕的密度會較高，
口感會綿密d、味道會濃郁d。
仲有勁多款式揀，比香港的富豪雪糕吸引好多！
我揀左Sherbet Choco Flake，AUD$8，
安迪揀左Sherbet Flake，AUD$7。
我地最後揀左雪葩，無揀到意式雪糕 lol
終於黎到St Kilda Beach，
當時係6點開始日落啦。
St Kilda Beach全長6公里。
呢個海灘比我的感覺好休閒好chill。
坐係海灘度睇下日落望下海，真係好寫意。
本身無諗住加St Kilda Beach去我個行程度，
但表弟堅持帶我黎，
好多謝佢帶左我地黎呢個咁舒服的海灘。
呢度每逢星期日的朝早十點至下午五點都有個市集，
但我地6點先黎到已經收哂鋪啦。
日落時分去St. Kilda Pier仲會見到企鵝歸巢添，
但我地book左後日Philip Island睇企鵝歸巢，
所以我地今日無特別去睇啦。
我地黎左呢間Paper Fish食d小食先。
地址：30 Jacka Blvd, St Kilda VIC 3182 Australia
我地叫左Calamari Rings 烤魷魚圈，AUD$7.5，
Fish Taco 魚墨西哥夾餅，AUD$5.5，
Prawn Taco 蝦墨西哥夾餅，AUD$6。
一路望住個出面個咸蛋黃一路食。
當時係7點半，
個太陽已經落左一半啦。
粉粉藍藍色的天真係好靚。
之後我地就搭Tram 3去返CBD食晚餐，
Uncle帶左我地黎唐人街附近的一間越南餐廳 Pho Bo Ga Mekong Vietnam 湄江牛河屋。
地址：241 Swanston St Melbourne, VIC, Australia 3000
餐廳都坐滿哂人。
牆上貼左好多名人黎食野嘅相，
包括前美國總統克林頓(Bill Clinton)、蔡瀾、洪金寶、成龍等等。
所以吸引好多遊客黎食。
蝦米卷，AUD$13，
比香港食到個d大卷好多！
無記錯安迪叫左特別牛雞河粉(M)，AUD16，
入面有雞肉、雞潤、雞肝、雞心、生牛肉、牛腩、牛丸、牛筋、牛柏葉、扎肉、牛骨髓，
好多料呀。
我就叫左特別牛河粉(S)，AUD15，
入面有生牛肉、牛腩、牛丸、牛筋、牛柏葉、扎肉、牛骨髓。
我明明order左細碗，但都勁大碗呀！
我仲叫左杯雪啡奶！
食完先記得影相，蝦雞春卷，AUD$8。
食完野之後我地就行返酒店，
見到Flinders Street火車站著哂燈。
夜晚的Flinders Street火車站好似仲靚呀。
澳洲有兩大超級市場，分別係Coles同埋Woolworths，
我地酒店附近就有間Coles啦。
安迪好鍾意用LYNX的止汗劑，AUD$3 一支，
香港都賣得好貴，所以買左三支。
買左澳洲牌子The Bar Counter的能量棒黎當早餐，AUD$2 一條。
(好肥！而家都唔敢食咁多能量棒啦)
澳洲的包裝食物都會有個Health Star Rating，
滿分係5分，越高分越健康。
Coles的5 Choc Cherry Slices超級好食，AUD$4，
最高層係朱古力，中層係車厘子＋椰子，底層係蛋糕，
夾埋就係椰子車厘子朱古力蛋糕，好邪惡！
右手面係Lindt的士多啤梨Lindor，AUD$5，都幾好食。
仲買左Juice Lab的兩支Pressed Juice朝早飲!
AUD$3 一支。
聽朝我地會一早出發去Great Ocean Road 大洋路！
旅遊日期：2018年10月14日- 2018年10月20日
=========================
=========================
| 覺得呢篇blog幫到你， 記得like Facebook Page: https://www.facebook.com/fatbjai.travel/ follow Instagram: fatbjai.travel https://www.instagram.com/fatbjai.travel/ YouTube: 曳豬到爆炸 收到個blog的最新update！ |
=========================
0 comments