去台北歎

去台北歎之 Day1a (中華航空,機場巴士,台北車站,電話卡)

By Wu Lok Yee - 5月 08, 2018

旅遊日期：2015年1月5日至1月8日
以下係呢4日3夜的行程，準備去台北的你不妨參考下先：

Day1: 香港機場->桃園機場->台北車站->酒店check in->淡水(漁人碼頭、情人橋、淡水老街)->士林夜市

Day2: 平溪(放天燈)->菁桐->九份->饒河街夜市

Day3: 忠孝敦化站-> 台北車站-> 西門站

Day4: 國父紀念館站(松山文創園區、誠品生活松菸)->劍南路站(美麗華摩天輪)->台北車站->桃園機場->香港機場

第一日的行程都幾多要注意的野，所以我分左兩 part黎打，同加左D細標題方便去睇。

1.中華航空

我搭朝早8點2的機去台北，所以凌晨4點鐘就要起身換衫出去，搭最早個班機場巴士去機場。我搭個班機係中華航空，可以係24小時前download "China Airlines”呢個app，早一日check-in 同揀座位。行李寄艙的時候職員都會問你用唔用電子登機證(即係個APP入面個Moblie Boarding Pass)，我建議叫佢幫你print張登機證，因為每次check登機證你都要開個APP然後禁個Mobile Boarding Pass出黎比部電話職員睇，都幾麻煩，所以都係用番傳統的登機證，然後夾係本passport度，要check的時候拎出黎就得，方便快捷好多。

中華航空雖然比國泰、港龍同長榮平，但係機內的娛樂都比我想像的好。機上的電影選擇好多，又有小遊戲玩。另外坐位都幾舒適(係機上訓左陣)，服務都唔錯，飛機餐都無乜特別，整體上對中華航空都好滿意。

2.台灣的廁所

去到桃園機場，第一時間係去左機場的廁所，因為係機上無去到廁所。台灣的廁所比香港乾淨，呢4日去左幾個公共廁所，出外最怕D公廁係污嘈同有異味，台灣整體都係比香港乾淨同無乜異味！

3.電話卡

出閘之後就去左ATM禁錢(詳睇去台北嘆之解謎篇)，然後買電話卡，電話卡有3間選擇包括大哥大、遠傳同埋中華電信，遠傳跟本就無人排隊，而大哥大同中華電信就好多人排，3間電話卡的價錢同plan都差唔多甚至幾乎一樣，我就買左NT$300大哥大電話卡，包左5日3G無限上網＋$50通話。買的時候出示番 passport、身分證同入台紙，然後填番張form，比部電話職員幫你入sim卡同較setting就搞掂好啦。張卡用左4日，除左搭台鐵係台北近郊的地方收得好差之外，我覺得大哥大上網係好快，仲快過香港(我用3台4G)。

4.機場巴士

買完電話卡就落下一層搭機場巴士。首先要係櫃位度買飛，我搭金光客運1819去台北車站，我就買埋來回車飛，一程就NT$125，買來回就NT$230，慳NT$20，方便回程唔洗再去買飛，而且張飛唔洗揀回程係幾時，你想幾時搭都得！車程大概50分鐘。

5.台北車站

去到台北車站就去左微風台北車站度食lunch，上2樓去左間日本餐廳叫"銀座杏子日式豬排"。我地坐左最入的橫台，可以望到台北車站的內部建築。我地叫左咖哩里肌豬排套餐NT$290同埋手工豬肉漢堡排餐NT$290，Waitress的服務幾好，佢地會介紹台上不同的醬料同食法。