Day 1上半日可睇番去台北嘆 之 Day1a (中華航空,機場巴士,台北車站,電話卡)

1.漁人碼頭＆情人橋

食完野買完Donut就搭捷運去酒店check in。酒店係西門町，叫"豪景大酒店”（我對酒店的評價請睇去台北嘆 之 酒店篇 (台北西門町,豪景大酒店)）。Check in之後就出發去淡水啦，由西門町搭捷運去台北車站，然後轉紅色線到淡水，車程都幾耐下，成19個站。搭捷運個陣太陽已經變左做咸蛋黃，比預期晏，所以原本plan係到左淡水站行左淡水老街先然後搭船去漁人碼頭，改左做搭公車去左漁人碼頭先之後先行淡水老街。到左淡水站已經5:25pm，係出口2出去直行就會見到個公車站，搭紅26，上公車搭左20分鐘到總站就到左漁人碼頭。

到左漁人碼頭，日落已經差唔多完啦。圖中個座橋就係情人橋，落左車行5-10分鐘先至行到去個座橋。

入黑後，座橋會變唔同的色，好靚。

橋上，好多人都係度影相。

橋的另一邊有個LOVE字，都係情侶黎漁人碼頭必影的地方，當時有好多人影緊，所以我地離遠自拍下就算。

漁人碼頭有唔少賣手信同食野的店，但係無乜人流，十分冷清，所以我地乜都無買，手信留番去淡水老街先買啦。

走個陣諗住去情人橋附近的藍色公路搭船去淡水老街，網上寫營業時間去到7點，但當時只不過係6:25pm，售票處已經關左，藍色公路都無人係度，似乎已經無船搭，所以我地去番車站搭紅26公車去淡水老街。

2.淡水老街

由於紅26總站係去番淡水捷運站，我地想由淡水老街的街尾度落車一路行街一路行番去捷運站，所以我地google map左係小白宮站落車，個個站最近淡水老街街尾。小白宮站度落左車之後跟google map行左2-3分鐘就到左淡水老街啦。

紅26路線圖，from http://yoyonet.biz/egoing/bus/beichi/mrt/r/026.htm.

淡水老街好長好多手信買，唔少手信都係係淡水老街度買。鐘意買野的你，呢條街真係必去！

軒記豬肉乾 NT$120，口感好juicy同幾淋，幾好味。

含笑半步癲NT$300，菓風小鋪買的，入面有10盒，每盒有3塊。其實含笑半步癲係白朱古力加爆炸糖，都幾得意，除開每塊要HKD$2.5，諗落都唔係好抵。

滬尾餅舖的牛軋糖NT$220，有5隻味，分別係花生、芝麻、咖啡、蔓越梅同杏仁果。呢個手信必買，好多朋友食完都話好食！

唔記得幫佢地影大相。

左面係阿婆鐵蛋NT$100每包。

右面係合益魚酥NT$50每包，好好食！必買！

5塊名信牌(木製名信片)，每塊NT$50。如果覺得普通名信片無乜特別可以買名信牌，而且係寄到架！(郵費details請睇去台北嘆 之 解謎篇)

晴光紅豆餅NT$10，抵食！

淡水老街就係買左以上咁多野啦，可能太晏，已經7點幾8點，有D鋪頭關左，大家想買野可以早少少去啦！

3.士林夜市

離開淡水之後，我地搭捷運係劍潭站落，去士林夜市食野。(當時1袋2袋好狼狽，影D相影得比較差比較朦，請見諒。)

 

 

官芝霖大腸包小腸NT$50，like左佢地的facebook page優惠$50條，原價唔記得幾錢啦，有得平緊係第一時間like啦！大腸包小腸好正，外面係糯米卷包住條腸好好食，而家睇番D相都好肚餓好想食呀！！！！

之後去左忠誠號食野。

忠誠號魯肉飯(大)NT$40，好正好好味，雖然話(大)，其實係細細碗。

忠誠號雞蛋蚵仔煎NT$55，唔錯！

香港都有的豪大大雞排，當時好多人排隊買！呢間豪大大得一樣野賣就係大塊雞排。

豪大大雞排NT$60，比香港更好食！

士林夜市地下街買的珍珠奶茶，NT$30，無乜特別，勝在平又大杯，食完豪大大好頸渴所以買黎飲。

BTW，地下街有D鋪頭地上都有，但地下街人流就少D，例如地下街都有豪大大但無人排隊，可能是因為地下街由兩個妹妹整雞排，地上就由大叔整可能係好食D。

大雕燒NT$60，貪得意買黎食下，其實無乜特別啦。

士林夜市就係食左咁多野啦，之後搭捷運番酒店休息，今日行左成日加上前一晚無乜點訓，兩隻腳攰到喊呀！

其他文章：
去台北嘆 之 解謎篇
去台北嘆 之 酒店篇 (台北西門町,豪景大酒店)
去台北嘆 之 Day1a (中華航空,機場巴士,台北車站,電話卡)
去台北嘆 之 Day1b (漁人碼頭,情人橋,淡水老街,士林夜市)
去台北嘆 之 Day2a (平溪,放天燈,菁桐,許願竹)
去台北嘆 之 Day2b (九份,饒河街夜市)
去台北嘆 之 Day3 (忠孝敦化,台北車站,西門町,度小月,Dazzling Cafe,阿毛)
去台北嘆 之 Day4 (松山文創園區,誠品生活松菸,美麗華摩天輪,Bigtom)
去台北嘆 之 購物篇 (化妝品,護膚品)

《去台灣嘆》系列
一家去台北 之 住宿篇 (西門町,愛客發時尚旅館)