今日我地一早起身出發去浮潛，
我地之前都未試過浮潛or潛水，
所以我地選擇易D的浮潛先！
同Local Tour一樣，
我地都係係Klook度book的，
名稱係慶良間浮潛體驗，
我地又係用盡所有優惠code，最後HK$996.2兩個人。
Book的時候要提供性別、身高(cm)、體重(kg)、鞋碼(cm)，
因為要預先為我地準備合身的潛水衣&蛙鞋。

早上7:30am，
專車就會去到酒店門口接我地。
浮潛前一日會收到確認的email。


上到車會填張form 關於你的身體狀況。

車上都有張紙用繁體字＆韓文寫低一D注意事項。

大約8點我地就黎到Marine House SEASIR，
我地會係呢度拎潛水衣&蛙鞋，同埋寄存貴重的物品，
然後我地就自行行去碼頭度，
大約5分鐘的距離。

碼頭好多遊艇停泊。

我地架遊艇就係前面啦！(我地係完全忘記幫架船影相 \掩眼\)

日本人真係好乾淨，
架船係一D臭的海水味＆明顯的污漬都無，
地板乾淨到我地全程好放心咁坐係地下。

浮潛有8個人，工作人員大約有10個人，
另外仲有參加左潛水的人都會一齊出海。
船上總共有成廿幾人。

遊艇有兩層，
內有細小的沖涼房、廁所、更衣室。
大家都輪流換上潛水衣準備。
潛水衣入面我著左泳衣，
因為件潛水衣好窄，
所以非常難著，
出盡九牛二虎之力先塞到個人入去！

我地換好衫係上層等工作人員為我地講解潛水的要點。

等待的時間我地就影下相。

其他參加者都係上層度休息下。

好期待一陣出海！

工作人員係下層做準備。

搭左接近兩個鐘船我地終於黎左第一個spot啦，
而整個浮潛會去3個spots度，總共潛3次。

好似寶石咁靚的海水。

我地的教練係一個身型幾肥的鬼佬，
無記錯佢係黎自比利時，
佢識日文，
所以佢會用日文同工作人員溝通，
同我地講野就會用英文。

浮潛小隊有8人，
最左面3位係韓國人，中間兩位係澳洲父女，
最右面係我地，同埋一位香港叔叔。

潛之前教練會派呼吸管比我地，
同我地講解呼吸管點戴，以及浮潛的方法。

著上蛙鞋，我地就準備落水啦！！
既興奮又緊張！

教練帶埋呢個浮板落水，
我地可以捉住呢個浮板黎浮潛，
如果我地游左去第度，
都可以靠呢個浮板認住教練的位置。

教練仲帶左部相機落水影相，
咁岩捕捉到我。

我剩係帶左iPhone係水底拍片，
個防水case係大阪Muji買的，
防水防塵等級係IPX7，
即係無防塵功能，
但防護水深1米及30分鐘的浸水，
岩岩好可以用黎浮潛，
不過係水底係禁唔到制，
所以要係水面禁左拍片制先。

當日都大風大浪，
所以好多海洋生物都匿埋左，
加上自己拍攝技巧，
好不容易先捕捉到魚仔們。

係手機拍的片cap出黎，
當時有個魚群出沒，
係電視或者水族館見得多，
幾乎零距離接觸都係第一次。

都係係影片度cap出黎，
好鮮豔翠綠 形狀不同的珊瑚。

差唔多1:00 pm，
潛左2個Spot之後，
工作人員就派飯盒比我地。
估唔到船上食的便當都幾精緻，
食物味道係唔錯，但就凍左無咁好食。

好彩仲有碗熱的烏冬，
我地潛水的時候唔係好凍，
但上左水好大風 個身就好凍，
食D熱食，個人都暖番。

大約2:30pm，
我地就潛最後一個Spot啦，
真係好唔捨得呢個好似綠松石咁靚的大海。

上水之後我地就轉流沖涼換衫，
沖涼房係用儲水式熱水爐，
我好後先沖涼，
到我沖個陣D水已經唔係好夠熱啦，
早知就早D爭沖涼房沖涼啦！

回程時勁大風大浪！
段片記得開聲 (留意0:03)
坐船邊隨時變落湯雞 lol

個天好似越黎越黑，
紅衫呢位就係我地教練啦。

D海水的顏色會唔會太夢幻啊

座間味村的一座橋。

我地的浮潛初體驗就黎到尾聲啦，
首先番Marine House SEASIR拎番寄存的野，
然後比個網址我地上去download番教練影我地的相，
(可惜影左我地好少相，而且佢同我地的距離太遠，另外網址隔左半年有多已經上唔番了)
最後專車會送我地番酒店。

總括黎講浮潛的體驗真係一試難忘，
整個人就是進入左海底世界咁，
眼前盡是海洋生物。
我諗夏天的時候黎一定會更多魚仔，
幸運的話可以見到海龜添。

我地番酒店休息一陣，
然後又去國際通行街食野啦。
下篇Blog再繼續day3的行程！

其他文章：
冬日非自駕沖繩遊 酒店篇 (那霸,DoubleTree by Hilton Hotel Naha)
冬日非自駕沖繩遊 Resort篇 (恩納,Kafuu Resort Fuchaku Condo Hotel)
冬日非自駕沖繩遊 Day1a (內附5日行程,港龍)
冬日非自駕沖繩遊 Day1b (屋台村,Naha Main Place,第1日就唔見野?)
冬日非自駕沖繩遊 Day2a (Local Tour,古宇利島,屋我地大橋,備瀨福木林道)
冬日非自駕沖繩遊 Day2b (Local Tour,美麗海水族館,御菓子御殿)
冬日非自駕沖繩遊 Day2c (Local Tour,萬座毛,掛上英殖香港旗的餐廳?)
冬日非自駕沖繩遊 Day3a (浮潛, 慶良間諸島)
冬日非自駕沖繩遊 Day3b (第一牧志公設市場,國際通,沖繩料理)
冬日非自駕沖繩遊 Day4a (首里城,那霸去恩納,利木津巴士)
冬日非自駕沖繩遊 Day4b (恩納必食餐廳,海葡萄蓋飯,琉球之牛)
冬日非自駕沖繩遊 Day5 (那霸機場有咩好買?)
冬日非自駕沖繩遊 買左咩手信?